漫畫有毒？

上回講到，宅女魂回歸，不只喪追返《銀魂》，仲終於開左其他一直想睇但冇的起心肝嘅黎睇，仲要型到係download落部tablet搭車睇。

唉，話過唔做低頭族，結果都係做左。不過唔維持得耐，因為用緊嘅睇漫畫app好唔update，咁我不如漫畫節買或者old school啲出去借好過啦。

不過因為做左低頭族，我發現左一個幾有趣嘅事實，就係啲人見你睇緊漫畫，多數都唔會坐去你隔離。唔通漫畫真係有毒？

有時搭公共交通工具，最在意嘅應該係坐身邊嘅係咩人。個人黎講最怕麻甩佬同阿嬸，而事實上，好似黃子華話，大部份時間「得」落隔離位嘅，都係麻甩佬，阿嬸都有。最近用tablet睇漫畫，感覺上比以前拎實體上手仲要大剌剌，真係少左人會一嘢「得」落黎，仲有效過坐走廊位。

諗左好耐，其實都唔明，漫畫呢回事有咩問題？有次同朋友出去佐敦一家叫阿摩咖啡嘅小店食晚飯，因為地方淺窄，我地一坐低嗰時坐我地身邊嘅係一對妙齡少女。由於我同朋友都對日漫有啲研究，話題一直圍繞住動漫，有時都會飛左出去講其他嘢，人生嘢都有但佔唔多。可能我哋又真係好唔considerate啦聲線唔識收細，嗰兩位「妙齡少女」一直唔多出聲，仲好似時不時有啲好不屑嘅眼神射埋黎，好似想笑我哋咁宅但又係咁忍……我堅唔理解，真係有咁怪？

最搞笑嘅係，兩位「妙齡少女」走左之後，黎左兩個西裝友，多數年過三十，一睇都知係秒秒鐘幾廿萬上落嘅朋友。佢地一坐低，開口第一個話題就係《海賊王ONE PIECE》。

話時話，阿摩咖啡真係好好食的。

漫畫同宅扯上關係我唔奇怪，事實係睇漫畫同睇書一樣，都係好個人嘅事，但我認為點都比玩Candy Crush實際，咁當然好睇你手上部漫畫係唔係好嘢，比方說，你書好睇唔睇，係要睇Twilight我都會一樣睇唔起你。

但如果將漫畫同「有毒」扯上關係，甚至要「彈開」，當成異類，老實講係好唔公平嘅事，點解玩Candy Crush就唔係問題青年而睇漫畫就係？我不知見過幾多人地阿媽因為玩Candy Crush而唔理個細路，又有幾多家長因為要個細路收聲而俾佢近距離睇YouTube，你sure咁真係比睇漫畫好？好多人都誤會漫畫點都唔可能有深度，只不過係「公仔書」，睇嘅人叻極有個譜，只係又有冇人諗過，創作出一部令人甘願一路追，甚至追足十幾年嘅漫畫，都唔係一件容易嘅事。

當然，嗰啲以賣肉為標榜同做晒market research先出嘅作品唔可以列入呢類。

而且，我可以好sure咁講，身邊好多對漫畫有研究嘅朋友都係知性型。

漫畫有毒？假如你一早就stereotype左成件事，你點唔可能睇到佢地有趣之處，而且一部有內容畫風又好嘅漫畫，絕對係藝術。

如果你覺得漫畫有毒，咁你都應該唔鐘意《叮噹》，因為人地個genre都係漫畫黎架。