太陽乾 #10

深夜，總係做咩諗嘢。

1. 違和感

違和感，日文漢字，如字面解就係「有違和諧的感覺」，更準確即係「不自然」，多用來形象一啲看上去唔多自然嘅畫面，但又會出奇地有喜劇效果，睇得動漫多你自己會明。

廣東話有一個更入肉但唔太科學嘅講法：「唔聚財」，拎黎形容直覺我覺得好好用。

例句：「其實我一上去見到個reception都就有強到不行嘅違和感，我同間公司氣場相沖呀。」

係，最近一次見工就有咁嘅感覺。唔係話間公司呃人，人家係大企業，但單單係一踏入office嗰一刻，一陣非常大嘅違和感就衝上腦，我就知，「唔得」。

同上一份工好唔同，上一份，唔知點解見工嗰日，一入office就感到maybe，I was to be here。見完老細，更加有衝動一定要應承個offer，唔係我會後悔。

結果，嗰一年，雖然辛苦，但係我得到一班好好嘅朋友，勝過咩工作經驗。

近呢一兩年我啲guts feeling愈來愈準，而我亦開始響一啲唔知點算、15 16嘅情況下憑直覺去走，有時候就算只係「不祥嘅預感」，都會多多少少有應驗。雖然有啲恐怖，但都partly証明左女人嘅直覺係可靠呢回事。學伽俐略（福山雅治）講，因為重複出現嘅機會好大，已經可以係一個現象。

呢排好多嘢都15、16，但唔知點解，某幾件事件出現，有啲係「和感」，亦有「違和感」。

我希望我跟隨呢啲直覺去做嘅決定，唔會令我太過後悔就好。

2. 有用

正如All I Really Need to Know I Learned in Kindergarten一書所寫，基本待人接物嘅事情，其實幼兒園已經會教。

可惜，唔係人人都可以保持赤子之心。

不過人性唔係我想講嘅話題，而係，一般黎講，對我有用嘅事，可以應付職場嘅嘢，其實中學甚至大學已經學左。

中學大學時都唔係精英，甚至使過包尾，但而家，過左咁多年，我可以好proud咁同所有老師講，你地教嘅，我有慢慢收到，慢慢吸收，漸漸進化成而家嘅我。

嗰啲望落最冇用嘅科目，先係最有用。

一路走來，我都好感恩，感恩至少響學科上我鮮有選擇錯誤。

除左Econ.......

3. 才早上吧

之前把《我不能戀愛的理由》再看，想起戲內有個有趣的「歲數時間兌換法」：那就是如果人的一生是一天24小時，把你的歲數除以3，得出的數字就是一天的時間，就可以了解自己係響邊個位

比方說20歲的人們，你們才是6時多，才剛起床吧？我就仲可以食埋早餐先開工嘅時間。

即使係30歲，lunch都未食，老咩？

其實唔只用黎鼓勵自己唔好太心1急，直頭可以係反駁30歲係中女呢種講法；10點咋，lunch都有咁快食啦，剛剛開工，中咩？

呀，瞓啦！

4. 底線、改變、愛

有啲一直以為唔會衝破嘅底線，嗰啲「如果XXX我一定會唔得」嘅條件，對住一個你夠愛嘅對象，其實都會主動打破佢地。

咁樣，應該係好嘅改變，是吧？