太陽乾 #8

1. 十年小粉

無記娛樂新聞嗰邊無啦啦播左其實已經係上個月嘅《SHOCK》 1000回記念，由於畫面出現左堂本剛同堂本光一，仲記得我為呢兩隻瘋狂過嘅媽子，叫我出房睇：

「阿女你黎望下金田一而家變成點？」

先補充，《SHOCK》其實係堂本光一主演嘅萬年musical，2000年做到而家都仲可以場場滿座，呢下仲值得紀念過1000回達成啦。試諗下一套劇情唔大變動曲目唔多改嘅舞台劇，響香港如果可以重演超過6次已經好犀飛利，仲要做足13年，有幾多套《29+1》呀講真，而且我唔信《29+1》每次個劇本都一模一樣。

嗰位好清楚我喜好嘅媽子，其實唔係太清楚我而家都仲有追佢地啲消息。過去呢幾年雖然我明言聽英文多過日文，聽rock多過聽pop，但對於兩位堂本先生所組成嘅KinKi Kids，我基本上係冇點甩過。由2001年嗰一首《ボクの背中には羽根がある》開始，聽到而家，原來都成12年。

同時証明剛嘅金田一係有幾深入民心，媽子到而家都仲係咁叫佢。（笑）

（救命，伊健首歌呀！）

媽子：「反而另一個……叫咩名話？（我：光一呀）係，光一就靚仔左喎！」
我：「只係成熟左，佢愈大愈瘦。」
媽子：「係，係成熟，但都靚仔左。」

唉，光一真陰公，名都俾人遺忘，不過讚係靚仔左你都總算有成就的。

真刻薄，明明光一先係本命。

2. 可愛？咩黎架？食得架？

呢排嗰首咁嘅Gwiyomi，hit到老豆都黎問我係咩事。好在Facebook唔多人洗板，唔係我真係會唔上去，新聞都唔睇。

我自己本身唔抗拒「可愛」——in a general sense，即係一隻白雪雪嘅狗仔，我都係term佢為「可愛」。

但Gwiyomi就係我抗拒，甚至係反感嘅嗰類。

我唔想多費唇舌講呢首比《Friday》更想反枱嘅「歌」，而係一件令我諗起首歌嘅真人真事。

又一城Starbucks可能近戲院，接收好差。今日響嗰度等人嘅時候，本來想用手提放wifi用tablet做嘢，可惜唔得。心情已唔多好，就係呢個時間我發現坐正響我隔離pair港男港女，仲用啲Gwiyomi式嘅語氣對話，最慘係毫無內容……

「你同我食我咪食囉～」
「但我唔批准你都唔可以食～」
「好啦咁我批准你食啦～」

類似啦，熱戀中嘅人大概都係白痴黎，但可以強到以冇粗口嘅情況下講啲比句句加「X你XX」更冇內容嘅對話。服！！

本來都收起左headphone，開唔成wifi，用Starbucks啲Jazz送《銀魂》都好吖，結果我都拎返headphone出黎，開左My Chemical Romance黎聽，開大volume……舒服晒。

如果要咁先有男朋友，同埋拍拖例必會變成咁，我寧願做嗰一個「如果係男人一定有好多狂蜂浪蝶」嘅男人婆，同一個把聲低tune到可以演男角嘅反串。

單身的覺悟，一早就有啦。

3. 報告

好__多功課，最近走堂意慾愈來愈大。

果然，sem完就係最冇原則嘅時段。