太陽乾 #1

（太陽乾，由意指雜項的sundry直譯過來。）

1. 尚未崩壞的城市景色 

最近分別到上環和九龍城走一趟，很慶幸香港還有未受侵蝕的地方，小店林立，新舊皆有，琳瑯滿目比現在的銅記尖咀吸引無限倍！上環的橫街s，天知道有多少世外高人藏在毫不起眼的舖內！麻甩茶記旁就是優雅西餐，加上不少店星期日休息，在這個幾乎窮得只剩下錢的崩壞之城裡，應該會有不少人對感到confused：「星期日先最多客呀，有錢都唔賺咁蠢」但，蠢蠢地先至係人生囉。

由上環步行至中環，是會有種由天堂墮進塵世的感覺的……

至於九龍城呢，雖然有不少新店，但夾雜在都比我大的老店中間，又別有另一番感覺。雖然飛機聲真的不再，但時間在這個小區，彷彿都會慢下來，改變是有的，但不大，都是緩緩的，不會令人喘息，更遑論會有整棟商場被踢走的荒謬情節。加上這裡還是食肆林立，以後飯聚要多多考慮這個地方。

豪華餅店依舊屹立在那大街轉角，只希望這道九龍清泉不會大受侵蝕，雖然媽不太樂觀，因為啟德那邊會有郵輪碼頭……

這裡，還有多少尚未崩壞的角落？

2. 妖，咁唔鐘意，唔好黎囉

樓下我有篇文係投訴一個唔肯學好廣東話嘅PSP同學，不過我想補充，其實佢都係一個有心嘅年輕人，雖然有時會固執到想打佢一身，但終究overall都係一個humble person，尤其對NGO事業熱中，其實都好開心識到佢。

對住呢類有識之士，都會對將來有一絲希望。

不過認真，唔係個個都係咁。有位同佢冇兩嘴嘅同學，俾我見識到對自己太有優越感嘅人嘅思維：咩都係自己地方最好，人地嘅就咩都唔得。

繼先前見佢嫌香港冇免費download歌聽嘅網站而要「委曲求全」聽英文歌，而家就見到佢投訴瑜伽班老師教得唔好，都算，點解連人地外貌身材都投訴埋呢？我都明白當你唔鐘意一樣嘢嗰時，真係可以少少嘢都好礙眼，但係，未至於要咁不滿。對方又冇踩親你，唔駛咁激動囉。真係咁唔鐘意，「看著也難受」嘅，你可以下堂開始唔上，再去搵過另一個course的，即你係真係可以走的又唔係返工返學咁被人綁死響一個地方。

容我再本地主義啲，如果呢度咁多嘢都唔合你閣下心水，唔好黎囉。

中港矛盾，之唔係有一方自我感覺極度良好，加上聲大夾惡所致。你禮禮貌貌，humble啲，尊重人地同時尊重自己，試下欣賞人家嘅好處，唔好咩都話唔掂，唔好話中港矛盾，世界和平都黎緊頭啦老細。

雖然，有啲嘢真係公認唔掂，例如犯法都當自己冇錯。

3. 同好相認

意外地將LUNA SEA拉闊報告send左俾同學，但又咁啱係嗰位愛rock n' roll嘅同學，有時緣份嘅嘢真係好得意，又唔見我send錯俾第二個？

不過竟然就咁更加深大家圍繞搖滾嘅話匣子，原來佢都識Suede BLUR Oasis等英國老牌band！仲發現大家都對熟男（aka大叔）有好感啲！最驚喜係sell到佢去開拓J ROCK！就由LUNA SEA開始，不過我幾相信鐘意Suede同黃耀明嗰type迷幻嘅，LUNA SEA多多少少都會中到。

話時話，我真係覺得RYUICHI個台風同Brett Anderson有啲似。

同好相認，永遠都係咁令人振奮嘅事黎。

4. 唔忍心插到盡

同朋友繼續檢討LUNA SEA拉闊，冷靜左就會發現其實嗰晚LS本身仲有好多嘢可以做得更好，尤其大家都唔可以否認……RYU真係失準。

其實嗰晚隱約都feel到佢有唔妥，總係好似差咁啲嘢咁，但......我唔會忍心話呢場唔係good show，咁對一個狀態本來就唔好嘅主音黎講，係一件好harsh嘅事，堅唔忍心。而且成晚都冇咩大件事發生，起碼係無事終了，雖然唔知後台有冇出過亂子，但，作為觀眾，眼見到冇問題，好smooth，已經好夠。

同時唔好忘記除左RYU，仲有SUGIZO呢個傷員。帶傷上陣，本來就係對表演者好demanding嘅一件事。一諗到咁，加上私心，真係鬧唔落口。

但我衷心希望佢地可以搵出問題所在，下次俾一場完美嘅演出大家！