太陽乾 #3

今次好多片

1. 得個睇字，都已經夠

同groupmates傾功課，其中同學帶左呢條TVC黎：

美髮用品廣告裡面呢個真係算絕核，而事實係，好多女性（包括我自己）睇男性第一眼都係睇頭髮先，除非閣下個樣真係出眾到整個以前啲修士嗰種頭都OK，否則髮型出事，成個look都會出事，仲要係冇得救嗰隻。

其實髮型先決係男女都合用嘅一個打扮守則。就個人而言，我係緊張個頭多過塊面的；gel頭與不gel頭、扎馬尾定公主辮、六四分定七三分定八二分，對成個人嘅氣質影響都好大，尤其對唔會點畫過塊面嘅男士黎講，gel一gel頭分分鐘可以由核突大叔變木村拓哉。

進一步諗，條line抵死之處就係表明男睇女，係睇胸部先。一石二鳥，呢條橋真係絕到核爆。

其實呢條TVC本來會拎黎做功課，可惜我地搵唔到另一條好嘅美髮產品廣告……其實係有嘅，就係呢條：

但，我地噒左好耐，都唔知個idea同consumer insight響邊，無奈放棄……

鐘意都係咁講，日本廣告有好多時……其實，真係得個睇字……（唉）

So what？人家淨係art direction加靚仔靚女加大膽直接嘅idea已經贏你成條街了。

2. 笑容的威力（OTM#5.1）

呢兩日INORAN呢場演出我loop左好多次。

我估我開始明白點解次次LUNA SEA演出佢都唔肯開口講嘢，07年場一夜復活都唔肯，皆因把聲真係唔多入咪，雖然佢平日講嘢把聲問題唔大，係同個人唔多襯之嘛。Honestly成首歌走音走得好嚴重，尤其係聽左RYUICHI嘅版本在前，INO唔走音都幾難超越RYU把本身達歌唱家級數嘅天碟聲。

但INO唱得好開心，好有感染力，仲要一路唱都唔知可以點處置隻右手，係咁上下揈，除左「可愛」我真係唔知可以點形容。去到4分40秒仲冇啦啦俾個失笑，平時見開佢擺出一副酷相，突然咁開朗，正能量無限發放，好成功咁擊潰我嘅防線。

曾經有個報告指出，最令人產生購物慾嘅，係BB仔笑聲，因為聽左成個人都融晒，心理上對其他嘢抵抗力都會減弱。其實呢個世界上最contagious嘅，唔係病菌，而係陽光一般嘅笑容，所以我完全唔會將自己底無可底嘅笑點當係缺點，而且笑多啲，人都會健康啲，I am totally fine with it。

繼J哥之後INO都就快進駐iPod，雖然唔會多，不過LS仝人已正式將我KO（鼓手真矢冇solo），恭喜晒，有機會你地又拆件黎我又會將血汗錢乖乖奉上。（重點）

同場加映最體現到INO個人風格的《千年花》。

3. 新星待望（OTM#5.2）

除左INO，呢幾日仲有聽緊ONE OK ROCK。

唔睇畫面，幾乎以為主音係一個識日文嘅英文人，但Taka係土生土長日本人，未出過國留學，仲曾經係偶像兵工廠Johnny's事務所嘅一員，本名森田貴寬。

最令我O嘴嘅係，原來Taka係NEWS仲係8個人嗰時嘅member。當年響山下智久、內博貴、錦戶亮呢幾張突出嘅臉孔旁邊，Taka只係無名細路一名，如今搖身一變，成為搖滾主唱，而且ONE OK ROCK更係現時J-Rock最有潛力嘅新樂隊之一。當日佢為學業退社，而家咁睇返，係明智決定。

Taka聲底唔差，carry到呢類熱血憤世式搖滾，更係屬於英文好嘅新一輩，可惜樣子不太行，繼續留響培育樣子先決嘅偶像工廠，講唔定會埋沒左佢，而且見到當日紅到顛左嘅NEWS如今半爛尾嘅下場（靚仔有市場嘅山下智久同錦戶亮先後離隊，內博貴同另一成員草野博紀更加衰未成年飲酒而要休止活動），Taka搵到OOR呢個歸宿真係好好彩。

而且日本偶像界生態比搖滾更唔健康，聽到前J家人有好前途，唔開心就假的。

睇好OOR，尤其佢地風格同一隊我好鐘意但面臨解散嘅樂隊真係非常相似，情感上已經加左分。